برطانیہ: کورونا وائرس کے علاج کی ویکسین کا دو رضاکاروں پر تجربہ

برطانیہ میں کورونا وائرس کے علاج کی ممکنہ ویکسین کا دو رضاکاروں پر تجربہ کیا گیا ہے۔

اس مطالعے کے لیے 800 سے زائد افراد کا انتخاب کیا گیا ہے۔

ان میں آدھے رضاکاروں کو کووڈ 19 کی ویکسین جبکہ باقی افراد کو گردن توڑ بخار سے بچاؤ کی ویکسین لگائی جائے گی۔رضاکاروں کو یہ معلوم نہیں ہو گا کہ انھیں کون سی ویکسین لگائی گئی ہے۔

یہ ویکسین آکسفرڈ یونیورسٹی کی ایک ٹیم نے تین ماہ کے اندر تیار کی ہے جبکہ یہ تحقیق جینر انسٹیٹیوٹ میں شعبہ ویکسین کی پروفیسر سارہ گلبرٹ کی سربراہی میں کی گئی۔

پروفیسر سارہ گلبرٹ پہلے کہہ چکی ہیں کہ وہ اس بارے میں ’80 فیصد پراعتماد‘ ہیں کہ یہ ویکسین کام کرے گی لیکن اب ان کا کہنا ہے کہ وہ اس بارے میں ’بہت پرامید‘ ہیں۔